Mutabani wa Babu afudde ffamire enoonya obukadde 1,500 okutaasa obulamu bwe!

ENFA ya Cedric Babu Ndilima, 50 ey’amangu ennyoggozza abantu naddala Bannakampala ababadde batandise okusonda ssente akawumbi kamu n’obukadde 500 okutaasa obulamu bwe.

Cedric nga mutabani w’eyali Minisita era omubaka wa Kampala Central, Francis Edward Babu ne Olive Zaitun Makambera Kigongo yafudde ku Lwomukaaga mu ddwaaliro lya Aga Khan e Nairobi mu Kenya gy’abadde assiza ku byuma ng’abasawo bwe basala entotto okumwongerayo e Bungereza okumussaamu omutima omupya okutaasa obulamu bwe.

Babu Bw'abadde Afaanana.

We yafiiridde nga waakayita ennaku bbiri nga famire ne mikwano gy’omunda bayisa kabbo Bannayuganda okumusondera pawunda 300,000/- ( mu za Uganda akawumbi kamu, obukadde 500) okusobozsaa abasawo abakugu okumussaamu omutima omupya.

Amawulire g’okufa gaagenze okusaasaana mu ttuntu ku Lwomukaaga nga Bannayuganda baakasondawo ddoola 39,358 (obukadde nga 200).

Abadde mukwano gwe ennyo mu byobufuzi, Hajjat Hannifer Mpungu yagambye nti yayogera naye wiiki ssatu emabega n’amutegeeza nti omutima bwe gwesibira ku kisaawe e Rwanda ne bamutwala mu ddwaliro mu ggwanga eryo kyokka bwe baamukebera ne bazuula ebitiisa.

Mpungu eyabadde ayogera ng’akaaba, yategeezezza nti abasawo bamuzuulamu obutole bw’obusaayi obwekutte bubiri ate nga n’omutima tegukyakuba musaayi bulungi. Baasalawo okumuweereza mu ddwaaliro erisingako e Kenya. 

Eno abakugu baazuula nga kyetaagisa kumuteekamu mutima mupya era ab’emikwano ne batandika okumusondera ensimbi nga okumulongoosa n’obujjanjabi bwonna bwetaaga kumpi akawumbi kamu n’ekitundu.

Baabadde baakasondako obukadde obusoba mu 300 obulamu ne bugaana. Wiiki ewedde abawagizi be mu Kampala Central mu kibiina kya NRM baamusimbawo okuvuganya ne mmeeya Salim Uhuru era erinnya lye lyateeka nnyo oludda lwa Uhuru ku bunkenke wadde yali mulwadde era okutuusa ku ssaawa esembayo eyali akulira okulonda bwe yalangirira nti tewali mulala yasasudde ssente za kwesimbawo ku kifo ekyo.

Abakulembeze mu Kampala Central bawooteevu olwa Cedric Babu okufa omutima. Ono yassaawo ebbugumu nga buli wa NRM amanyi nti ono yaabayunga ku kibiina kya PLU abali wansi wa Gen. Muhoozi.

Minisita wa Kampala, Hajjat Minsa Kabanda yategeezezza nti ono abadde mwana waabwe gwe bakuzizza mu ffamire ya Capt. Francis Babu eyakulembera ennyo Kampala. Yasaasidde ffamire n’aba NRM okufiirwa omukulembeze abadde atuula mu lukiiko olufuzi olwa NRM.

Mmeeya Salim Uhuru yagambye nti NRM amaanyi gaayo gabadde mu bakulembeze nga bano nti nga bwe beevuganya munda oluvanyuma beegatta ne bakulembera bulungi ekibuga nga bali bumu.

Mmemba wa ffamire ya Babu, Ssentebe Kasim Lubowa yanyoleddwa okufa kwa Cedric Babu n’ategeeza nti abadde yakuzibwa bulungi ate nga wa ffamire ekola ebyobufuzi bya Kampala Central.

Cedric Babu Ndilima abadde munnamawulire akoze ebbanga ku UBC TV. Abadde munnabyamizannyo era abadde munyenye ya ggwanga mu kuzannya tennis. Yavuganya ku bubaka bwa palamenti mu 2021 naye Mohammed Nsereko n’abawangula. Abadde ku lukiiko lwa PLU mu Kampala Central.

Abakulembeze mu Kampala abenjawulo okuli bassentebe b’ebyalo naddala Saad Lukwago, Sande Nkoyoyo, Kayigo Kikule, Daud Lwanga, Goeffrey Sserwadda n’abalala bakungubagidde Babu ne basaasira ffamire n’aba NRM okumufiirwa.