Gayaza Junior School beetisse empaka za Inter Schools Scrabble Tournament

GAYAZA Junior School beetisse empaka za scrabble ez’okuvuganya mu mpaka za Inter Schools Scrabble Tournament ezaabadde ku ssomero lya Wampeewo Ntake SS ku Lwomukaaga.

Amasomero ga pulayimale ne siniya 15 ge gaavuganyizza mu mpaka zino ezaategekeddwa ekibiina ekya Scrabble Association of Uganda (SAU) nga Gayaza Junior School ye yeetisse eky’abawala ku mutendera gwa pulayimale ate Good Times n’etwala eky’abalenzi.

Abayizi ba Gayaza Junior nga bakutte ekikopo kyebawangudde. okuva ku kkono Meghan Ankunda, Meagan Owomugisha ne Elizabeth Nakimuli.

Omutendesi wa Gayaza Junior okuva mu Future Stars Sports Program, Ronald Lwebuga ategeezezza nti obuwanguzi bye bimu ku bibala mu kukyala kwa pulezidenti wa Africa mu muzannyo guno, Adekoyejo Adegbesan eyagutongoza mu ssomero lino omwaka oguwedde ate nga n’abazannyi balina obumanyirivu.

Amyuka Akulira essmomero lya Wampeewo Ntakke ss ng'akwasa team y'abawala abaasinze

“Abazannyi bataano baabadde ku ttiimu ya Uganda eyakwata ekyokuna muzaabato ba Africa omwaka oguwedde e Kenya. Abazannyi batendekebwa bulungi era nsiima abaddukanya essomero lino ababawa obudde,” Lwebuga bwe yategeezezza.

Amyuka akulira eby'ekikugu mu kibiina ekitwala omuzannyo gwa Scrabble mu Uganda Godwin Murungi ng'akwasa omuzannyi akize ku banne ensimbi ssaako ne board ya Scrabble ku mutendera gw'amasomero ga Primary

Baawangudde ekikop ne baweebwa n’okizannyiro kya scrabble.

Ez’amasomero ga siniya zaayongezeddwayo lwa budde kuziba nga zaakuddamu okutegekebwa okusinziira ku w’ekikugu mu SAU, Godwin Murungi.

Akulira eby’ekikugu mu SAU, Joel Muwanika ategeezezza nti ono kaweefube okunoonya ttiimu egenda okukiikirira Uganda mu mpaka z’ensi yonna ez’abato eza World Youth Scrabble Championships ezigenda okubeera mu ggwanga lya Kenya mu August omwaka guno.

Ategeezezza nti baakwongera okutegeka ez’okusunsula abazannyi okuva mu lijoni endala amangu ddala.