Emizannyo gy'abaliko obulemu gisombodde abantu e Gulu

Abantu mu kibuga Gulu beesombodde okwerolera ku mizannyo gyabaliko obulemu egyabaddemu abantu abasinga obumpi mu Uganda. Emizannyo gino gyategekeddwa ekibiina ekiddukanya emizannyo gyabaliko obulemu mu ggwanga ekya National Paralympic Committee (NPC) ku kisaawe kya Pece.

Abampi nga bavuganya mu mizannyo gy'abaliko obulemu e Gulu

Abamu ku baavuganyizza baatambudde ngendo okuva mu district ezetolodde Gulu okuli Kitgum, Nwoya, Oyam ne Kiryandongo okwetaba mu mpaka zino ezokunoonya ebitone mu bantu abaliko obulemu nga beetegekera empaka zensi yonna ezigenda okubeera mu kibuga Los Angeles ekya Amerika mu 2028.
Yadde nga Uganda ezze yeetaba mu mizannyo gyabaliko obulemu ku mutendera gwensi yonna, ebadde tebafunayo bantu bampi kutukiikirira. Kati NPC etunuulidde okunoonya abantu ekika kino okussibwa ku tiimu yeggwanga eyabaliko obulemu.

Akulira ebyokunoonya ebitone mu NPC Irene Nabisenke yabadde mumativu nomutindo ogwayoleseddwa e Gulu bwogerageranya nebitundu gyebazze bagenda.
Nabisenke yayongeddeko nti abanaaba balondeddwa baakwongera okubangulwa ate abanaasinga okukola obulungi bassibwe ku tiimu yeggwanga.

Emizannyo gy'abaliko obulemu

Bano baavuganyizza mu mizannyo egyenjawulo omwabadde okukanyuga olunyago, okukanyuga effumu nokukanyuka akazito. 
Omutendesi weggwanga Vincent Mutagubya, yasiimye abazanyi okuva e Gulu olwokwolesa omutindo omulungi nokuvuganya. Wabula Mutagubya yafunyemu okutya olwabasinga ku bantu abazze okuba ngta baabadde bampi nnyo ekibateeka mu ttuluba lyabaliko obulemu erisinga okubaamu okuvuganya.
Pius Opiyo owemyaka 20 okuva mu district ye Nwoya yomu ku basinze okukola obulungi mu kukanyuga akazito nga yakanyuze mmita 5.30 yadde nga gwemulundi gwe ogwabadde gusoose okukanyuga. Ono yabadde abuzaako katono okuweza mmita 8.20 ezisookerwako nga kino kyawadde abatendesi essuubi okuba nti asobola okweyongera okukola obulungi nga bamuteeseteese bulungi.

Emizannyo gy'abaliko obulemu

Empaka ezaabadde e Gulu zetabiddwamu nabam uku bazanyi abali ku tiimu yeggwanga okuli Daniel Onega (T47), Brian Rubangakene (T47) ne Prisca Aciro. Abalala kuliko Fred Amanzuruku (T44) ne Steven Otekayot (T47) abaakozesezza empaka zino okwetegekera empaka za Tunisia grand prix ezigenda okubeera mu kibuga Tunis mu mwezi ogwomukaaga.
Okugezesa abazanyi abaliko obulemu kwakukomekkerezebwa nempaka zabazanyi ezigenda okubeera mu district ye Soroti ku ntandikwa yomwezi ogujja