Emihendo y’ebicoori ekyendiire omuri Kamwenge.

N’ebya Christine Kyarikunda

KAMWENGE

Disiturikiti ya Kamwenge nemanwya kurungi omukuhinga ebicoori kandi eki nikyo kyarugiirireho engamba erikugira ngu “Abaine abaabo Kamwenge ebicoori nibariisa amaani,”.

Obwa hati abahingi bashobangiriirwe bwanyima y’ebicoori kugwa ebeeyi kandi ereteire entaasya y’abantu b’omuri Kamwenge yakyendera.

Sadick Byaruhanga, Orikukurira eby’obushuubuzi n’amakorero omuri Kamwenge naagira ngu ekireteire emihendo y’ebicoori kukyendera n’ahabw’okugira ngu tibyakishohora aheeru y’eihanga.

Naagira ngu hati ebicoori omuri Kamwenge nibigura ahagati ya shiringi 600 kuza ahari 620 aha motoka ezirikubitwara, shiringi 550 aha sitoowa na shiringi 500 aha bahingi.

Eihanga rya Rwanda okweza ebicoori ni kimwe aha nshonga ezireteire ebicoori bya Uganda byadiba.

Byaruhanga naagira ngu Kenya yaaza kutwara ebicoori netwara ebirungi ebirikuruga omu disiturikiti eya Kasese, Kiryandongo hamwe na Lira ahabw’okuba abahingi b’omuri za disiturikiti ezo nibahinga embibo eziri aha mutindo kandi banika gye ebicoori byabo.

Nayongyera ashoborora ngu omuri Kamwenge, abahingi abaingi nibahinga embibo ezitahikaine na mutindo beitu ngu bariyo nibataho oburyo kureeba ngu bashomesa abahingi omugasho gw’okuhinga ebicoori ebiri aha mutindo n’okubireberera gye.

Byauhanga ahabwire abahingi ba Kamwenge kwehayo bakatamu esente baaba nibenda kuganyirwa kihango omu buhingi bwabo.

Omwe aha bahingi kuruga omu kyaro kya Ntonwa omuri Bwizi naagira ngu owaabo kiro y’ebicoori eri ahari shiringi 400 kuruga aha muhingi. 

Naagira ngu nibafa ekyagabiguza ahabw’okuba tibaine ky’okukora kandi baine kugarura abaana baabo aha mashomero.

John Byoruganda, orikukurira abahingi b’ebicoori omu gomborora eya Nkoma naagira ngu ebicoori kugwa akatare kikareetwa abahingi baingi kwejumbira munonga omu kuhinga ebicoori.

Mastula Natebwa, orikukurira puroguraamu ya ACDP naagira ngu gavumenti eherize kuheereza abahingi entundubaare ahansi y’entebeekanisa egi kubaasa kwanikaho ebicoori byabo kureeba ngu tibyasisikara.

#WestUpdates