Ab’eby’okwerinda omuri Ibanda bataho 'curfew' y'ekiro.

N’ebya Omushaki weitu

IBANDA

Ab’eby’okwerinda omu disiturikiti eya Ibanda bataho curfew y'ekiro aha mirimo erikukorwa omu kiro ahabw'akanya-bwanya bwanyima y’abahekyera kutaahiriira disiturikiti ebaheeriire eya Kamwenge. 

Emirimo eyateebwaho emihingo omu shaaha z'ekiro harimu; okushaba kw’ekiro (Night Prayers), ebivuuro, Kiarioks, Discos, Night Clubs n’endiijo. 

Abahekyera ba ADF bataahiriire disiturikiti ya Kamwenge omu kiro ky’ow’okubanza basiga baita abantu 10 n’abandi bahutaara.

RDC wa Ibanda, Caleb Tukaikiriza, yaashaba DISO, Diisi, ceeyamaani wa disiturikiti, meeya, tauni kiraaka wa Ibanda Munisiparite, orikukurira Bihanga Barracks, Pooriisi n’ebindi bitongore by’okwerinda okureeba ngu ekiragiro eki kyateebwa omu nkora omu bwire bw’ebiro bikuru ebiturimu.

Tukaikiriza yashaba abantu b’omuri Ibanda okuza aha buzoora maisho kandi baheyo abantu abu batarikukyenga omu byanga byabo.

#WestUpdates