UMSC etandikireho ehururu y’okurwanisa empenda biragiro omumashomero agarikwegyesa obusiraamu

UMSC etandikireho ehururu y’okurwanisa empenda biragiro omumashomero agarikwegyesa obusiraamu

N’ebya Abdulkarim Ssengendo

Mbarara:

Ekigombe ky’abasiraamu ekya Uganda Muslim Supreme Council (UMSC) nikishaba abasiraamu omuri Mbarara n’ebindi byanga kukwatanisiza hamwe n’okukoragana na gavumenti.

Eki nikija kugarukamu ebizibu ebi abasiraamu baine omubyanga byabo.

Ebi bigambirwe Sheikh Ali Muhamad Aluma, Omuhandiiki mukuru w’ekigombe ekya UMSC, agumize ngu ebizibu ebimwe ebi abasiraamu baine omubyanga byabo nibireetwaho obutakwatanisa na gavumenti.

Ogu naagira ngu kimwe ahabizibu ebi baine n’amashomera agarikushomesa ediini y’obusiraamu agatahandiikirwe.

Nashoboorora ngu amashomero agamwe agatahandiikirwe nigegyesa abaana emicwe mibi, ekirikucumbagiza eby’okwerinda omu eihanga.

Sheikh Aluma ebi abigambire nyomwabazyo ahamukoro gw’okwiguraho eitendekyero erya HEDEF Runaway Islamic and Vocational School omuri Mbarara City North division.

Eitendekyero eri eriheerizeho $300 million ryombekirwe ekitongore ekya Ngali Development Foundation ekya Turkey abarikukwatanisa n’abasiraamu omuri Germany okwombeka ebyombeko by’okushomeramu omu Uganda.

Aluma ashabire abarikukurira amashomero hamwe n’amatendekyero agarikushomesa ediini y’obusiraamu okwehandiikisa na UMSC baaba bari ab’okubahwera batunga obureemezi.

Uganda Muslim Supreme Council beigwireho eitendekyero ry'eby'emikono omuri Mbarara City North Division...(Photo by Abdulkarim Ssengendo)

Omuhwezi wa RCC wa Mbarara City North division, Robert Kanusu asiimire abeebembezi ba Mbarara abashagikire purogyekiti egi..

Kandi hoona ashabire abatuura kwejunisa eitendekyero eri erikwija kuba niritendeka aboojo b’emyaka 12 kugaruka ahaiguru eby’emikono.

Aluma n’abandi bakuru kuruga omu UMSC basiimire gavumenti ya NRM eyebembeirwe Purezidenti Museveni ahabw’okwikiriza ebigombe by’amadiiki kutandikaho amashomero agaabo kushomesa abantu baabo.

Ekigombe ky’abasiraamu ekya UMSC kiine amashomero 1,386 ga purayimare omu eihanga, 360 aga siniya na Univasite ibiri, ebihwereire abasiraamu kutunga obwegyese n’okureetaho entunguuka omu eihanga.

#WestUpdates