Tunga Nutrition bagenda kulaga akalungo ke bakolera wano mu mwoleso

OLUVANNYUMA lw’abalunzi okwettanira okukoza akalungo ka Hendrix akabadde katuusibwa kuno kkampuni ya Champrisa International, kkampuni ya Tunga Nutrition etandise okukakolera kuno.
Dr. Samuel Ssewagudde, akulira kkampuni ya Tunga Nutrition, annyonnyola nti, omwaka oguwedde baatandika okukolera kuno akalungo ka Hendrix akasinga okubeeramu ebirungo ebikuza obulungi ebinyonyi n’ebisolo ebirundibwa nga bizinensi olwo omulunzi n’ayongeza amagoba ga ffaamu ye.
“Okukozesa akalungo okutabula emmere y’ebinyonyi n’ebisolo gwe mulembe oguliko kyokka obusinga bubadde busuubulibwa kuva mu mawanga ag’ebweru nga ffe tubadde tukakolera mu Budaaki ekibadde kibufuula obw’ebbeeyi ne kikendeeza n’amagoba,” Ssewagudde bw’agamba.
Mu mwoleso gwa Harvest Money ogw’okubeera ku kisaawe e Kololo okutandika ku Lwokutaano nga February 23 okutuuka ku Ssande nga February 25, bagenda kulaga abalunzi nti, kisoboka okukola akalungo mu Uganda ate ne kasigala nga ka mutindo ng’akabadde kaggyibwa ebweru.
TUNGA NUTRITION ETADDEMU SSENTE
Tunga Nutrition, emu ku kkampuni ezaatadde ssente mu mwoleso guno ng’okuyingira osasula 10,000/- ate n’okwetaba mu misomo egigenda okutegekebwa buli lunaku nawo osasula 10,000/- era ng’ennaku zonna esatu wagenda kubeerawo emisomo egikwata ku bulimi n’obulunzi okuli n’okw’abayizi b’amasomero.
Kkampuni eno kitundu ku kkampuni ya Nutreco emu ku kkampuni 10 ezisinga okukola emmere y’ebisolo mu nsi yonna ate n’eya Tunga Farm Holdings erina ettabi e Kenya.
“Abalunzi abanaakyala ku mudaala kwaffe ne Champrisa International nga bakitunzi baffe, bagenda kusobola okunnyonnyolaengeri akalungo gye kakolebwamu era tukkiriza n’abajja ku kkolero okulambula kuba twagala abantu bakozese ekintu kye bategeera obulungi,” bwe yagambye.
Okukolera kuno akalungo kano kitegeeza nti, omulunzi ogenda kufuna akalungo akaakakolebwa kuba akaggyibwa ebweru waliwo ebirungo ebitaataaganyizibwa olw’ebbanga lye kamala n’entambuza. Mu ngeri y’emu kigenda kutondera abalimi naddala aba soya, ebitungo ebinene ne kasooli akatale k’ebirime byabwe.
Agamba nti, baliko ebibiina mu bitundu nga Kiryandongo, Karamoja n’ebirala okwetooloola Uganda okulaba nga basobola okufuna obungi bwa kasooli ne soya obwetaagisa okukola akalungo okutuukiriza obwetaavu bw’abalanzi obweyongera buli lukya.
Ekyuma kya Tunga mu kiseera kino kisobola okufulumya ttani 15 ez’emmere y’obuweke oba ttani 20 ez’emmere y’ensaano mu ssaawa emu. Mu kiseera kino bakozesa ttani za kasooli ezisoba mu 500 n’eza soya ezisoba mu 600 buli lunaku nga kino kitegeeza nti, abalimi bagenda kufuna akatale.
“Wabula okufuna omuwendo n’omutindo, tukolagana n’ebibiina by’abalimi b’ebirime bino era abalimi omukisa okwogerezeganya naffe okulaba bwe tukwatagana nabo tubaguleko ebirime byabwe kuba tubyetaaga,” bw’agamba

TEMUSUBWA MWOLESO GWA HARVEST MONEY

Dr. Ssewagudde akubirizaabalimi n’abalunzi obutasubwa mwoleso gwa Harvest Money kuba gulimi eby’okulaba n’okuyiga ntoko ebigenda okubayamba okukyusa enkola z’okuddukanya ffaamu zaabwe basobole n’okwongera ku magoba gaabwe.
“Omwoleso guno twasooka okugubeeramu mu 2019 e Namboole naye okuva olwo, bingi byakyuka mu bizinensi yaffe kuba twafuna bakasitoma abayitirivu ekyatuwalirizza n’okuzimba kuno ekkolero okutandika okukolera wano akalungo kaffe okutuukiriza obwetaavu bwabwe,” Ssewagudde bw’agamba