By’olina okukola ng’ogula mmotoka eriko nnamba puleeti za digito

MU nteekateeka ya Gavumenti ey’okukyusa nnamba puleeti z’emmotoka okudda mu za digito, kyangu omuntu okukuguza emmotoka enkadde olw’okuba eriko ennamba mpya.

Ying. Kharim Kibuuka, avunaanyiizibwa ku kwekebejja ebidduka mu minisitule y’ebyenguudo n’entambula yagambye nti, okufuna nnamba puleeti eza digito ennaku zino emmotoka eyinza okuba nga yabbibwaako nnamba puleeti oba nga yagwa.

Kino kikolebwa oluvannyuma lw’okutuukiriza obukwakkulizo omuli okulanga mu mpapula z’amawulire n’okufuna lipoota ya poliisi.

Waliwo n’emmotoka enkadde eziweebwa obutereevu nnamba za digito nga muno mulimu eza gavumenti ezitundibwa ku nnyondo, ezitawa musolo nga ziyingizibwa mu ggwanga n’ezebitebe by’amawanga.

Ennaku zino waliwo n’abalina emmotoka ez’obwannannyini abavuddeyo okufuna nnamba puleeti eza digito.

Mu mbeera eno kyangu okulowooza nti, mmotoka gy’oyagala okugula mpya, wabula nga nkadde.

Simon Mugerwa, omukugu mu by’ebidduka era nga musuubuzi w’ezo ezaakava wabweru w’eggwanga agamba nti, olw’embeera eriwo, oyo ayagala okugula emmotoka alina okusooka okunoonyereza okwewala okugula emmotoka enkadde.

Mugerwa agamba nti, kya magezi okusooka okutuukirira abavunaanyizibwa ku biwandiiko by’ebidduka mu minisitule y’ebyentambula n’enguudo okumanya ebikwata ku kidduka ky’ogenda okugula.

Agamba nti, osobola okumanya ddi ekidduka kino we kyayingizibwa mu ggwanga, nnamba ppuleeti ze kiyiseemu kuba waliwo mmotoka ezaakyusibwa okuva nnamba puleeti ennene ez’ebifo omukaaga okugeza UBC 176 okudda ku bulamba obutono obw’ebifo omusanvu, okugeza UAB 754Q nate zigenda kuddamu okukyusibwa.