Chris Evans ku by'okufuna omubeezi amubiita: "Ebintu byange mbikwata mpola, oluusi kikanga abakazi"

Chris Evans Kaweesi agamba nti ekimu ku bikyamulemesezza okufuna omubeezi amusuuta y'engeri gy'akolamu ebintu bye mpola mpola mu ngeri ya 'slow motion' ekanga abakazi.

Bwe yabadde ku yintavuyo ne munnamawulire omu n'abuuzibwa ku by'okufuna omubeezi oluvannyuma lwa Chosen Becky gwe baagenda naye e Canada okuyimba okussayo obutambi nga Evans ali bulala ne muganda wa Becky, kyokka yabyegaanye n'agamba nti tebali mu mukwano.

Evans yakkirizza mu bwesimbu nti abakyala abasinga b’atuukirira bafumbo ate abandi bamaama abalina abaana ate nga babeera bokka (soma single mothers).

Eky'okulwawo okufunha amubiita yakitadde ku ngeri gy’akolamu ebintu mpola ate mu bugenderevu. 

Chris eyakuyimbira 'Si binene' yagambye nti abakyala banguyirwa nnyo abasajja abanguwa okukola ku byetaago byabwe ye ky'atali kuba atera okutwala obudde bwe ekivaako okusubwa emikisa gy'abakazi.

Yagasseeko nti yeetegereza ebintu by'abakazi n'akizula nti abasinga baagala ssente z’abasajja so ssi mukwan o ogwa nnamaddala. 

N'agamba nti ye ng'omulimi w’ennyaanya, yeenyumiriza nnyo mu mukazi ayagala okukola ssente, talina ky'ayagaza bali abanoonya ssente nga tebafuddeeyo kumanya ngeri gye zikolebwamu sinakindi okwenyigira mu kuzikola.

Chris Evans azze afuna abakazi ne bamwabulira nga muno mwali ne Jamirah Karungi eyayuugumya emikutu gya yintaneeti ng'amwabulidde n'afuna omusajja omulala.