Pallaso gwe baagala agende ajjanjabe Chamilli mu Amerika agambye nti alinayo ebivvulu 5

OBUTAMBI ng’omuyimbi Douglas Mayanja amanyiddwa nga Weasel yeecanga nga kw’atadde okuleekaanira waggulu bwakedde kusaasaanira mutimbagano.

Weasel mu kiseera kino ali mu America gye yatwalibwa ne mukulu we Jose Chameleone okumujjanjaba.

Obutambi obwafulumye bulaga Weasel ng’aliko gw’ayombesa ng’alaga obutali bumativu ku ngeri gye yabadde amuyisizzaamu.

Juliet Zawedde Lwe Yakyalira Chamilli Mu Ddwaaliro.

Weasel ne Chameleone baatwalibwa Juliet Zawedde mu mwezi gwa December era okuva olwo y’abadde abalabirira nga Chameleone bw’afuna obujjanjabi. 

Mu katambi Weasel alaga nti akooye America ng’ayagala kudda ka ku butaka asobole okusanga mukazi we, Sandra Teta gw’agamba nti abayaaye bayinza okumusigula.

Kigambibwa nti oluvannyuma lw’akatambi okusaasaana, ffamire ya Mayanja yatuuzizza olukiiko nga baagala Weasel akomewo olwo Pallaso agende ajjanjabe Chameleone.

Wabula Pallaso agamba nti alinayo ebivvulu 5 nga yatandise dda n’okubyetegekera era nti okubisazaamu si kyangu.