Omushaija acweriirwe kukomwa emyaka 30 ahabw’okuhamba nyina- Busia.

N’ebya Egessa Hajusu

BUSIA

Kooti enkuru omuri Busia aharwakana ecweriire omushaija kukomwa emyaka 30 ahabw’okuhamba nyina kimuzaara w’emyaka 60.

“Obujurizi oburetsirwe ab’orubaju oruhababi omu kooti nibumara kwomesereza omushaija ogu ngu akahamba nyina kandi tihariho kubusabusa kwona omushango ogu gwakusinga,” Omuramuzi Henry Isabirye Kaweesa.

Jackson Okello, 30, omutuura w’omu kyaro ekya Daha omu muruka ogwa Bwaniha omu gomborora eya Busiime omu disiturikiti eya Busia asindikirwe omu kihome ekya Morokatipe omu disiturikiti eya Tororo.

“Omukaikuru arikumanya buri kimwe tarikubaasa kurugayo kushwaza omutabani omu maisho g’abantu baingi ahabw’ekikorwa eki yakozire kyaba kitarabireho,” Omuramuzi arikwongyera kushoborora.

Kooti ehuriire ngu nyakujunaanwa omu kwezi kwa 9, 2020 akataahiriira nyina ou yashangire omu kishengye kye yabyama nawe hamwe n’omu kwezi kwa 6, 2021 obu yabaire ari omu kiyungu ateekire eby’okurya kandi omurundi gwa kashatu, omukazi ogu akiruka yaasiga omutabani arikwenda kubyama nawe.

Omuramuzi akyorekire ngu nihabaasa kuba habaire hariho obuteikirizana omu maka kwonka ngu eki kikaba kitarikumanyisa omutabani kubyama na nyina.

Omuramuzi akyenderiize aha kifubiro ky’okukoma omushaija ogu amagara ge goona nikwo kusharamu kumukoma emyaka 30 omu kihome bwanyima ya Puriida wa kitabaraizibwa kushaba ngu omuntu we aheebwe ekifubiro kiringaniire arikugira amaka tigarikuburamu obuteikirizana beitu nibabaasa kushutama babugonjoore.

#WestUpdates