Tushwijumire amaka g’owabaireho minisita Maganda kuronda amabaati ga OPM- ab’eby’okwerinda

N’ebya Egessa Hajusu

BUSIA

Ab’eby’okwerinda bakozire okucondooza omu maka g’owabaireho minisita w’eihanga ow’enshonga za East Africa, Julius Maganda ahabw’okuteekateekwaho kuba aine amabaati g’omu ofiisi y’enganzi y’eihanga.

Omuhwezi wa RDC wa Busia- Grace Kanuna, DISO- Piston Musinguzi hamwe n’omuduumizi wa Pooriisi ahabwa disiturikiti ya Busia- Didas Byaruhanga nibo babaire bakuriire omuhiigo ogu aharwakataano ebiro 05/01/2024 omu maka ga Maganda omu kyaro ekya Bulekei ‘A’ omu gomborora eya Lunyo omu disiturikiti eya Busia.

Ab’eby’okwerinda bateirwe omu maka ga Maganda omu mwabazyo gw’orwakana bwanyima y’amakuru kworeka ngu amabaati g’omu ofiisi y’enganzi y’eihanga ni gamwe aha bintu ebyibirwe kuruga omu faamu ya Maganda.

Eki kizireho bwanyima ya Maganda kuhababa omushango gw’okwiba amabaati ge 102, ekyoma ky’okwosya ebyoma, enkoko 160 n’ebindi.

Okurugiirira ahari Kanuna, nibenda kureeba ngu amaka g’owabaireho minisita garinzirwe gye n’okumanya yaaba n’amaziima ngu Maganda abaire aine ebintu bya gavumenti nk’oku amakuru gabaire nigoreka ngu amabaati gibiirwe ngu kwonka omu sitoowa hasigiiremu amabaati agandi.

Beitu, bwanyima y’okucondooza, amabaati aga buraijo aga gauge 32 nigo gashangirwe omu sitoowa ya Maganda.

Maganda ahairwe foomu y’okucondooza kugitaho omukono kandi Kanuna amugambire ngu nibaza kumwihaho aba Pooriisi 3 ababaire bateirwe omu maka gye. 

Nabwo ashabire Maganda okuhandiika omu butongore arikushaba ab’eby’okwerinda omu maka gye yaaba nabenda.

Arikugamba aha nshonga egi, Maganda ajumiriire abu atarikwikirizana nabo omu by’obutegyeki ahabw’okujanjaaza amakuru gagwire n’ekigyendererwa ky’okumusisira eiziina.

#WestUpdates