Omushaija asingisiibwe ogw’okwiba ebitookye by’eishomero.
N’ebya Stephen Nuwagira
IBANDA
Kooti y’eidaara ry’okubanza eya Ibanda esingiise omushaija w’abaana 2 omushango gw’okwiba ebitookye omu rutookye rw’eishomero.
Thomson Karugaba ahairwe ekifubiro ky’okukora emirimo ya burungi-bwansi bwanyima y’okwikiriza ngu akaiba emisisa 2 y’ebitookye ebyabariirwemu shiringi 30,000 kuruga omu rutookye rw’eishomero erya Nyakateete Primary School ahabiro 02/01/2024.
Karugaba, 31, omutuura wa Nyinebaare omu woodi ya Bugarama omuri Bisheeshe Divijoni omu Munisiparite ya Ibanda naija kuba nakora emirimo y’aha kooti kumara eshaaha 5 omu biro 4 by’ekifubiro ekimuhairwe.
Arikuha Karugaba ekifubiro, Omuramuzi Esther Murungi agizire ngu nyakujunaanwa tasisiire kooti obwire kandi ashabire okusaasirwa mukuru w’eishomero eriyayibireho ebitookye.
#WestUpdates
No Comment