KCCA erambudde ekizimbe kya Nabbi Kakande
Oct 20, 2021
OLUKIIKO lwa KCCA oluvunaanyizibwa ku by'okuteekerateekera ekibuga n'okulondoola omutindo gw’ebizimbe mu Kampala olwa Physical Planning Committee lwetemyemu ku bizuuliddwa ku kizimbe kya Nabbi Samuel Kakande.
By Moses Lemisa
Journalist @New Vision
Kino kiddiridde ku Lwokubiri amawulire okuyiting’ana ku mikutu gy’amawulire nga ekizimbe kya Nabbi Kakande owa Synagogue Church of all Nations ekizimbwa nga bwe kyaguddeko oludda ekyawalirizza akakiiko kano okukirambula leero.
Aba KCCA baakulembeddwa Muhamadi Wasswa Mwanje amyuka ssentebe w’akakiiko kano
Era olwatuuse baasoose kusaba Nathan Kizito yinginiya w’ekizimbe ppulaani n’agibalaga n’abategeezza nti byonna ebibadde byogerwa nti ekizimbe kyagudde si bituufu.
Kizito yannyonnyodde nti ekyaguddewo eggulo ku Lwokubiri abakozi baatisse akuuma akakozesebwa okusomba ebizimbisibwa (Crane) bbulooka nnyingi ne kalemererwa ne kagwa ne kalumya abakozi basatu okuli Alex Batumbi 26, Robert Dembe35 ne Eddy Namasanga 40 be baatutte mu ddwaaliro e Mulago okufuna obujjanjabi. Yayongeddeko nti ababiri baabasiibudde era omu ye yasigaddeyo nga naye tali mu mbeera mbi.
Yagasseeko nti ppulaani y’ekizimbe kino yayisibwa KCCA wabula baatekaayo okusaba kwabwe wabeewo ebikyusibwamu, abavunaanyizibwa mu KCCA ne babalwisa bo kwe kusalawo okubaako bye bakyusa.
Mwanje yagambye nti ensonga yinginiya Kizito z’ababuulidde bagenda kuzituusa eri be kikwatako mu KCCA okulaba nga bakyusa mu nkola y'emirimu kubanga kwandiba ng'okulwawo okukola ku kusaba kw’abantu ekibaviirako okuva ku ppulaani ne bakola ebyabwe.
No Comment