Ab’e Lungujja bagemeddwa Covid 19 n’okukeberwa omusaayi

Enkola eno yabadde mu maka ga Patrick Lukenge ssentebe wa Mbuubi era ng’abatuuze bagemeddwa Covid 19 ssaako n’okubakebera omusaayi gwa mukenenya.

 Abasawo baakulembeddwa Ronald Kabuye omusawo omukugu era n’ategeeza abatuuze ng’eddagala bwe litalina buzibu bwonna ku muntu.

Abatuuze baafunye ddoozi esooka Astrazeneca ssaako ne Pfizer ddoozi ey’okubiri era omusawo yakuutidde abantu obutakozesa biragalalagala nga omwenge nga bamaze okugemebwa.

Edward Bukko, amyuka Ssentebe wa Wakaliga zzooni 8 yeebazizza nnyo ekitongole kya YUDEL n’abasawo okuva e Mengo.

Omu ku batuuze abaagemeddwa

Akulira abasawo b’ekyalo kya Lungujja, Brian Kimbugwe yategeezezza nti eno enkola nnungi okuleeta enteekateeka nga eno okutuukira ddala ku muntu wa wansi kubanga abantu bangi babadde tebamanyi bifo we bagemera Covid 19 nga kino kyakwongeza ku muwendo ogugemeddwa mu muluka gwaffe.

Ivan Kisitu omu ku batuuze abagemeddwa yeebazizza abasawo okuva e Mengo n’ekitongole kya YUDEL olw’okubalowozaako okubaleetera enkola y’okugema mu kitundu.

Daisy Nambogga,  akulira eby’emirimu mu kitongole kya YUDEL kino yategeezezza nti ekigendererwa kya kutuusa bujjanjabi eri abantu era bakolera mu bitundu bya Nakulabye ne Lungujja era leero basazeewo kuleeta kugema covid mu kitundu kya Lungujja.