Museveni awadde ab'e Masuliita ente 20 okujaguza Eid Adhuha

PULEZIDENTI Yoweri Museveni agabudde Abasiraamu ne banna NRM mu ggombolola y’e Masuliita e Wakiso ennyama wakati mu kujaguza Eid Adha ey’okusala ebisolo.

Museveni yawadde ab’e Masuliita ente 20 nga 10 ku zo zigenda eri Abasiraamu ate 10 ne zigenda eri banna NRM mu ggombolola. Ente zino yazikwasizza ssentebe wa NRM mu ggombolola y’e Masuliita Muwada Namwanja.

Ezimu ku nte Pulezidenti ze yawadde ab'e Masuuliita.

Namwanja yasiimye pulezidenti olw’okulowooza ku bantu gye yalwanira n’abagabula ente era nga bo banna Masuliita bamwenyumirizaamu kuba ye munnabyabufuzi yekka eyavuddeyo okubayamba.

“Bannabyabufuzi n’abantu abamaanyi bangi abava e Masuliita naye tebavuddeeyo wadde okusala embuzi, pulezidenti abasoomoozezza nnyo era nsaba bakyuse mu nneeyisa balowooze ku balonzi.” Muwada bwe yayongeddeko.

Yagambye nti buli Eid lw’ebeerawo tebajula kuba pulezidenti ne ofiisi ye babalowozaako nga bo banna Masuliita era ne basuubiza nti nabo tebagenda kuva ku main.

Abantu nga bagabana ennyama.

Ye ssentebe wa bakyala mu ggombolola y’e Masuliita Vicky Katongole yasabye Bannamasuliita n’ebitundu ebirala okuvaayo bawagire enteekateeka za Gavumenti okuli PDM n’emyooga basobole okwekulaakulanya.

Yabakuutidde okusigala nga bawagira NRM kuba pulezidenti abalowozaako nnyo ng’ekimu ku bitundu gye yalwanira mukuleeta eddembe mu ggwanga.

Ente ezaabaweereddwa zaatwaliddwa nga zisaliddewa era ennyama yagabiddwa eri abantu ab’enjawulo e Masuliita.