Essaza lye Lugazi lyongedde okwenyeza mu byenjigiriza

Omusumba wa Klezia atwala essaza ly’e Lugazi, Christopher Kakooza agguddewo essomero lya pulayimale ku kitebe ky’essaza e Lugazi ku Lutikko.

Bp. Kakooza ategeezezza nti essomero lino erya St. Micheal Nnassale ne Puylayimale erigenda okutandika ku ntandikwa y’olusoma lw’omwaka guno lizimbiddwa ku nsimbi eziweereddwayo abagabi b’obuyambi okuva mu ggwanga ly’e Ireland Helen ne Micheal Kinsella.

Bp. Kakooza oluvannyuma lw’okuggulawo essomero lino ng’omukolo gwetabiddwako ne bannansi ba Ireland bano ba Kinsella, yategeezezza nti okuva mu mwaka gwa 1997 essaza ly’e Lugazi lwe lyaggulwawo ne lizimba ekitebe ky’essaza mu kifo kino, ekitebe kibadde kibulako essomero ery’omulembe okuyamba okusomesa abaana b’omu kitundu okuva mu kibuga ky’e Lugazi n’ebyalo ebirinanyeewo.

Eklezia mu ssaza ly’e Lugazi eweza amasomero ga ppulayimale agasoba mu 200, aga ssekendule 25 ate amatendekero ag’omutendera ogwa waggulu 8.

Micheal Kinsella ne Fr. Lule ku ludda lw'essomero olulala ewali pulayimale

“Essomero liirino lizimbiddwa ate nga lya mutindo, kati abazadde mmwe musigalidde okuleeta abaana bammwe basome. Twebaza nnyo bannaffe ba Kinsella olw’obuyambi buno bwe batuwadde okulaba nga bongera ettoffaali ku musingi gw’eby’enjigiriza mu ssaza lyaffe n’ekitundu okutwalira awamu,” Bp. Kakooza bwe yategeezezza.

Dayirekita wa Caritas mu ssaza ly’e Lugazi, Fr. John Baptist Lule nga ye yakwanaganya ba Kinsella yagambye nti babadde mu nkolagana okumala kati emyaka egisoba mu 10 nga bayambye okuddaabiriza amasinzizo ag’enjawulo, baatandikawo ekifo omukuumirwa abaana abatalina mwasirizi n’ensonga endala nnyingi.

Ba Kinsella baasimye enkolagana gye balina n’essaza ly’e Lugazi ne basuubiza okugenda mu maaso nayo.

“Ndi mumativu n’engeri ensimbi gye zikwatibwamu n’okulaga embalirira Fr. Lule bw’azze akikola, ate bwe gutuuse ku kiteekeddwa mu kifo kino ne ndaba nga ddala kiyitirivu,” Micheal Kinsella bwe yagambye.

Dr. Augustine Kato ssaabakristu w’essaza ly’e Lugazi ku lw’Abakristu naye yasiimye ba Kinsella n’omusumba Kakooza olw’enteeka ez’enjawulo ezitumbula embeeraa z’abantu ab’enjawulo mu by’enjigiriza, eby’obulamu n’ebirala