Aba factory z'amajaani baagala Gavumenti ebaliyirire

SIPIIKA wa palamenti Anita Among asabye abalimi ba majaani ababadde batandise okusiguukulula ennimiro zaabwe okukikomya mu bunnambiro kubanga palamenti teyinza kubalekerera.

Bino webijidde nga abamu ku balimi ba majaani bategeezezza nga bwebagenda okugasigukulula olwa fakitole eziri eyo mu 9 zaggalawo nga abantu  100,000 baafirwa emirimu gyabwe nga kino bakiteeka ku gavumenti obutavaayo ku bbeeyi yaago eyongera okugwa n’ebizibu ebirala omuli n’amassannyalaze agakaweerege.

Abalimi b'amajaani nga bali mu nsisinkano ne Sipiika

Leero abalimi n’abakola amajaani n’aba fakitole  okuva mu kitundu ky’e Tooro nga bakulembeddwamu ssentebe wa disitulikiti y’e Kabalore- Richard Rwabuhinga ne RDC  Festus Bandeeba baletedde sipiika okwemulugunya kwabwe mwebagalira palamenti ebayambe kubanga omulimu gwabwe gugwawo.

Enock Kibbamu owa Nyamba factory agambye nti ebbeeyi y’amajaani buli olukya eyongera kulinnya ate nga ebitundu 99 ku 100 agakolebwa gatundibwa bweru n’agamba nti akatale kabagwako.

Sipiika Among agambye abatandise okusengula ennimiro zaabwe basooke baddirizeemu nga palamenti bwetunnula mu nsonga eno era okwemulugunya kuno agambye wakukutwala mu kakiiko k’ebyobulimi okukutunnulamu