Kiwalabye Male alaze abazadde amakulu g’okusomesa abaana baabwe

EYALI minisita w’obuwangwa e Mmengo, David Kiwalabye Male awadde abazadde amagezi okufuba okuwa abaana ebyetaago ebinaabasobozesa okufuuka aboobuvunaanyizibwa mu nsi.

Kiwalabye yabyogedde aggulawo essomero lya Happy Kids Nursery School e Mityana. “Kituufu embeera ekalubye naye twewalirize abaana tubatwale mu masomero agali ku mutindo era tubawe ebyetaago kuba kino kye kirabo ky’oyinza okumulekera nga omuzadde mu nsi ekitaggwaawo,” Kiwalabye bwe yasabye.

Omutandisi w’essomero Eria Mulaliira yagumizza abazadde nga bw’agenda okukuumira essomero ku mutindo ogwa waggulu kuba akimanyi bulungi nti ebisinga okuzimba obwongo omwana abifuna mu buto.

Ssentebe wa divizoni ya Busimbi, David Malagala yeebazizza Mulaliira olw’okutandika essomero n’asuubiza okumuwa obuwagizi obwetaagisa. Ssentebe wa NRM mu disitulikiti ye Mityana, Jonh Kato naye omukolo yagwetabyeeko.