Omukazi afumise bba ekiso ekimusse

ABAAGALANA bafunye obutakkaanya ne balwana, omukazi n’afumita muganzi we ekiso mu lubuto n’afa.

Bino byabadde Nansana ku Yesu Amala mu disitulikiti y’e Wakiso mu kiro ekyakeesezza Olwokubiri.

Eyattiddwa ye David Lugemwa, wabula muganzi we eyamusse abadde amanyiddwaako lya Ruth lyokka.

Kigambibwa nti omukazi bwe yalabye nga muganzi we afudde, omulambo n’agusibira mu nju n’abulawo.

Baliraanwa bategeezezza nti guno si gwe mulundi ogusoose ng’omukyala ono yeegeza mu kutta bba, nga n’ogwabadde gusembyeyo kyawaliriza OC Amala Katongole okuyingira mu nsonga zaabwe.

Kigambibwa nti olutalo lw’abaagalana bano lwatandise oluvannyuma lwa Lugemwa okukomawo awaka ng’ava okulaba omupiira.

Abatuuze baagambye nti oluyombo olwabadde lwetabiseemu n’emiranga olwasirise, Ruth n’afuluma n’asibawo ennyumba ekyaleetedde baliraanwa okwekengera.

Baamenye oluggi era baagenze okusanga nga Lugemwa ali mu mbeera mbi ne bamuddusa mu ddwaaliro wabula bwe baamutuusizza ne babategeeza nti afudde.

Oluvannyuma poliisi yazze ne yeekebejja enju awaakoleddwa ettemu n’omulambo ne gutwalibwa mu ggwanika.

Omwogezi wa poliisi mu Kampala n’emiriraano, Patrick Onyango yagambye nti poliisi enoonyereza ku ttemu lino.