RDC Matovu akyusiddwa n'azzibwayo e Buikwe

RTD. Major David Matovu abadde RDC w’e Kakumiro azziddwaayo e Buikwe n’asooka okusisinkana abamyuka be n’abakuutira okunyweerera ku kyabaweesa emirimu, enkola ya gavumenti esobole okutuuka ku bantu b’e Buikwe.

Ono yaliko e Buikwe ng’ekyali ku Mukono era okuzzibwaayo abantu baakisanyukidde nga bamujjukira okubeera ennyo mu bantu ate ng’asalawo.

Rdc Matovu Ne B'akola Nabo Bwe Baabadde Mu Lukiiko E Lugazi.

Erias Wamala Ssentebe wa NRM e Lugazi agambye nti Matovu mumalirivu, takolera kintu bweru w’amateeka ate tayagala kunyigiriza bantu.

Matovu yasisinkanye abamyuuka be n’abakubiriza okulondoola buli ekigenda mu maaso mu Disitulikiti y’e Buikwe basobole okumanya kye basaanidde okukola.

Be yasisinkanye kuliko; Lydia Kalemeera atwala Njeru n’abamyuka be babiri ssaako Juma Kigongo owa Lugazi n’abamyuuka be babiri okuva mu magombolola amalala.

Matovu abakubirizza okulondoola enkola za gavumenti n’emirimu gyonna okuli amasomero, amalwaliro n’empeereza endala.

Maj. Matovu abadde Kakumiro gye yaggyiddwa n’azzibwa e Buikwe nga ye Machael Kibwiika abadde yaakaweerezebwa e Buikwe yatwaliddwa Jinja.