Eby’okuyimbula Besigye byongedde okukaluba

EBY’OKUYIMBULA Dr. Kiiza Besigye byongedde okuwanvuwa n’okukaluba era ab’oludda oluvuganya eggulo bwazibye basala ntotto ku ngeri gye bagenda okuyambamu Besigye okuva mu kkomera.
Mu nsinsinkano y’aboludda oluvuganya eyatudde ku kitebe kya NUP e Makerere – Kavule, nga yeetabiddwaamu Pulezidenti wa NUP, Robert Kyagulanyi Ssentamu,
Pulezidenti wa ANT Mugisha Muntu, Pulezidenti wa UPC Jimmy Akena, Pulezidenti wa PFF Erias Lukwago n’abalala, baavuddeyo nga bakkaanyizza nti gavumenti
bagiwadde essaawa 48 zokka okuyimbula Besigye oba si ekyo
balangirire ekiddako.
Olukiiko luno lwabadde lugenda mu maaso, nga mu kibuga Kampala Poliisi eri mu kugobagana n’abakyala ba PFF abaabadde beekalakaasa olwa Besigye kubeera mu kkomera, era gye byaggweeredde ng’abantu bataano bakwatiddwa okuli omumyuka wa
loodi meeya wa Kampala Doreen Nyanjura, Ingrid Turinawe, Fiona Kabayiza, Faridah Nongozi ne Shadia Namubiru. Omwogezi wa Poliisi muKampala n’emiriraano Patrick  Onyango yagambye nti abataano bano baguddwaako omusango gw’okukuma omuliro  mu bantu era kino baabadde bakikolera mu kibuga wakati, nga baavudde
ku Mini Price ne batambula nga boolekera Arua Park, kyokka Poliisi
n’ebataayiza nga bali ku William Street n’ebakwata.
NYANZI OWA NUP NAYE BAMUKUTTE Ngy’oggyeeko okukwatibwa kwa Nyanjula ne banne, ne Fred Nyanzi, mukulu wa Bobi Wine yakwatiddwa abantu abatannamanyika
abaabadde babagalidde emmundu ne bamubuzaawo.
Bobi Wine yatadde obubaka ku mukutu gwa X ng’agamba ntiNyanzi yakwatiddwa awo ku Bbiri bwe yabadde ava ku Kavule.
Bino byonna byagenze okubaawo, nga Kyagulanyi yakedde mu kkomera e Luzira ne ttiimu eyabaddemu Winnie Kiiza, Alice Alaso, David Lewis Rubongoya, Joel Ssenyonyi n’abalala nga bagenze okulaba ku Dr. Besigye, kyokka tebaasobodde kumulaba olw’okuba omubiri gwe gukyali munafu nnyo.
Kyagulanyi ne banne bwe baavuddeyo, baagambye bannamawulire nti abasirikale b’amakomera baabagambye nti Besigye tebasobola kumulaba kubanga munafu
tasobola kutambula kusisinkana bagenyi be.
Wabula nti yabaweerezza obubaka nga abagamba nti baleme kulwanirira ye yekka, wabula balwanirire n’abasibe abalala abaasindikibwa mu kkomera nga bayita mu kkooti y’amagye, kubanga okuva kkooti ey’oku ntikkolwe yasalawo nti kkooti y’amagye
 eriwo mu bumenyi bw’amateeka, buli musibe eyali agiwolezaamuyalina kuyimbulwa.  Ku Ssande, minisita w’ebyamawulire Chris Baryomunsi yatadde obubaka ku mukutu gwe ogwa X eyali Twitter n’agamba nti yakyaliddeko Dr.
Besigye mu kkomera nga n’abasawo be weebali, n’amubudaabuda nti addemu okulya ku mmere kubanga gavumenti eri mu kwanguyirizaako okulaba nga fayiro ye etwalibwa mu
kkooti eza bulijjo, nga kkooti ey’oku ntikko bwe yalagira.
Minisita w’ebyamateeka Norbert Mao naye yakkaatirizza nti buli kitongole kya gavumenti ekikwatibwako kigenda kussa mu nkola ensala ya kkooti ey’oku ntikko ey’okugya fayiro z’abantu abaali bavunaanibwa mu kkooti y’amagye zidde mu kkooti eza bulijjo. Mu mbeera eno, Mao yagambye nti ssaabawolereza wa gavumenti, omuwaabi wa gavumenti, n’omulamuzi akulira abalamuzi ba kkooti enkulu, bali mu kwogerezeganya ne kkooti y’amagye okulaba engeri fayiro zino gye zigenda okutambuzibwamu, era omuwaabi wa gavumenti ye mwetegefu okufuna fayiro zino, azitwale mu kkooti enkulu zitandike okuwulirwa.
Ku Ssande akawungeezi Besigye yatwaliddwa mu ddwaliro erimu e Bugoloobi okumwekebejja embeera gy’alimu, era oluvannyuma yadiziddwaayo mu kkomera e Luzira.