Omusuubuzi attiddwa e Nakawuka omulambo gwe ne baguleka mu nnyumba ab'oluganda mwebagusanze nga gumaze ennaku ssatu

Omusuubuzi w'e Kasenge ku luguudo lw'e Nakawuka, attiddwa, omulambo ne baguleka mu nnyumba abooluganda mwe bagusanze nga wayise ennaku ssatu.

Halima Nampeera 38 ng'abadde mutuuze w'e Kasenge  mu Kyengera town council, ye yatugiddwa, omulambo ne baguleka mu kazigo mu zooni y'e Bwebajja Cell e Kajjansi. 

Kitegeezeddwa nti omugenzi, yakoma okulabibwako nga Dec 31, muganzi we Moses Guminsiriza omuvuzi wa boda boda bwe yamukima okuva mu makaage e Kasenge. 

Okuva olwo, teyakomawo , abooluganda ne batandikirawo omuyiggo, kwe kusanga omulambo gwe mu kinaabiro mu kazigo, nga guliko enkwagulo nga kisuubirwa nti baamutuze n'afa. 

Amyuka omwogezi wa poliisi mu Kampala, Luke Oweyesigyire, agambye nti, omulambo bagututte mu ggwanika ly'eddwaliro e Mulago, okugwekebejja, nga bayigga Guminsiriza asuubirwa okuba nga yeyamusse era nga mu kiseera kino, aliira ku nsiko.