Ekibiina ekidduknya omuzannyo gwa ddigi kisiimye bannabymizannyo okuva mu 2023

EKIBIINA ekifuga mmotoka ne ddigi z’empaka mu ggwanga (FMU) kijjukidde abavuzi ne bannamuzannyo abazze basukkuluma ku balala ne kibasiima oluvannyuma lwa sizoni ssatu emabega nga kisirise.

Omukolo gaggadde, ogwetabiddwaako abantu 958, gw’abadde ku myaliiro ebiri ku Silver Sprint Hotel e Bugoloobi ku wiikendi, FMU kwe yatuuyanidde n’okugaba ebirabo 511 eri bannamuzannyo abazze basukkuluma okuva 2023 okutuusa 2025.

Ronald Ssebuguzi eyawangudde NRC omwaka oguwedde ne Yasin Nasser kyampiyoni wengule ya Afrika (ARC), be bamu ku baasinze okwetikka omukolo n’ebirabo ebingi ate n’okukola eggulire.

Abalala; Ibrahim Lubega Pasuwa ow’omutendera gw’emmotoka ezisikira ku mipiira ebiri (2WD) yafunye ebirabo 7; eza 2023 ssatu, 2004 bbiri ne 2025 bbiri.

Abamu ku basiimiddwa nga bakutte engule zaabwe

Musa Ssegaabwe eyamalidde mu kifo ekyokubiri ku kalenda ya NRC omwaka oguwedde, yakukumbye ebirabo 7 okuli; ebya 2023 (1) 2024 bbiri ne 2025 za mirundi 4.

Abooluganda abavuzi ddigi baakung’aanyizza abirabo 31; Ariella Katende yafunye (3), Abigail Katende (8), Jonathan Katende (6), Miguel Katende (6), wamu n’eya munnabyamizannyo ew’ebyasa (Life achievers award), ne Yasin Semakula (7).

Wabula wadde omukolo gwakoleddwa, naye bannamuzannyo abasinga tebaabadde basanyufu;

Abdul Kateete omuvuzi w’emmotoka z’empaka ate muzadde w’abawala abavuga ddigi; Sharifah Kateete, Shadia Kateete ne Ahmed Kateete, y’omu ku bangi abeemulugunyizza ng’agamba nti tebeetaaga kubategekera mukolo gumenya biddaala nga gwe baakoze, “Kati baampadde engule za muwala wange Sharifa eyagenda e Bulaaya, zaaki, tuteekamu ssente naye FMU tetubalaamu kaabuntu,” Kateete bwe yeemulugunyizza.

Omuvuzi Dr. Moustapha Mukasa yeegasse ku Kateete n’ajjuliza ensonga ya FMU okutuulira ebirabo bino, kiviiriddeko baddereeva bangi okufiirwa abavujjirizi nga balowooza nti omuzannyo gwa bafere. “Nze ndi ddokita omutendeke naye tetwerabira nti endwadde nnyingi mu bantu, omuntu Tumusiime ng’akyali mulamu,” Mukasa bwe yategeezezza.

Ssaabawandiisi wa FMU Reynolds Kibira yagumizza bannamuzannyo nti FMU ebadde erimu emiroboli mingi naye ebirabo bino byakugabibwa buli mwaka nga bwe gwali emabega