Football Classroom erinze kalulu

FOOTBALL Classroom FC, eyatandikira ku mukutu gwa WhatsApp ogw’abantu ab’enjawulo abagoberera omupiira, eraze nti mu Uganda mulimu ebitone.
Ttiimu eno eterina liigi mw’ezannyira, y’emu ku ttiimu 64 ezirinze akalulu k’empaka za Stanbic Uganda Cup ku mutendera gwe gumu ne ttiimu kirimaanyi mu mupiira gwa Uganda okuli, KCCA, Villa, Vipers n’endala. Okutuuka ku mutendera, Football  Classroom yawandudde ttiimu z’omu Kampala 5.

Yasooka kukuba Kayda Sports Club ey’omu Divizoni y’e Makindye. Omupiira guno, Football Classroom yaguwangulira ku ggoolo 5-0. Mu nsiike eno, Steven Yigga yateebako 3, Amuli Mukasa ne Simeon  Ssevvume buli omu yateebye emu. Jean Sseninde FC (2-0) Lukui Hearts (2-1) ne ttiimu ya SC Villa ento eya Wembley gye baakubye (1-0) okwesogga oluzannya lwa ttiimu 64. Mu mipiira gyonna, Football Classroom ekubiddwa ggoolo 1 yokka.

Dan 'Mzee' Sserunkuuma owa Football Classroom FC ng'akuba peneti ate mu kirala ye Simeon Ssevvume ng'atagaza aba Lukuli Hearts. Football Classroom yawangula (2-1) mu Stanbic Uganda Cup e Nakivubo.

 

ERI KU BAAMUSAAYIMUTO
Football Classroom kye yasooka okukola, kwe kugizimbira ku bazannyi abato abakyalina embavu okuli abakyali mu ssomero n’aba baddeko mu mipiira gy’Amasaza
nga bonna bakyayaayaana okuwangula.
Amuli Mukasa ye yasinze okuteeba ggoolo mu Big League sizoni ewdde ng’ali mu Ntungasaze FC, Simoen Ssevvume yali mu ttiimu y’eggwanga eya 20 wani wa Jackson Mayanja nga kati ali mu St Mary’s Kitende.

Becky Nakimera akulira emirimu mu Football Classroom

ANI BWONGO WAAYO?
Omukozi wa Bukedde, Becky Cynthia Nakimera y’akulira emirimu mu ttiimu eno (CEO) ate Felix Ssekabuuza ne Joel Muwanguzi ‘Man Jo’ be batendesi abagifudde enzibu okukuba.

Ssekabuuza ye yawangulidde esaza lya Buweekula ekikopo ky’Amasaza sso nga yasooka kuwangulira St Julian ekikopo ky’amasomero ekya USSSA ekyali e Masaka.

Ssekabuuza (ku kkono) ne Man Jo.

Abalala abaliemabega wa ttiimu eno kuliko, Anthony Tumwesigye eyeeyita ‘hedimansita’ waayo. Omukutu gwabwe kwe bayita okusonda ssente za ttiimu. ‘Gungu Boy’ Moses Arinaitwe y’omu ku banene baayo.
TTIIMU Y’ABAWAGIZI Nga ttiimu eno erinayo omupiira, abantu bangi, omuli abaaguzannyako, abaamawulire, n’abakulira kiraamu endala mu liigi ez’enjawulo babeerayo okunyumira omupiira