OWA CAF AKOONEDDEMU UGANDA KU AFCON

PULEZIDENTI wa CAF, (ekibiina ekiddukanya omupiira mu Afrika), DR. Patrice Motsepe akooneddemu Uganda, Kenya ne Tanzania nti zirina obusobozi obutegeka empaka za AFCON, eza 2027 ez’omulembe.
Yabadde mu kibuga Rabat ekya Morocco awabumbujjidde empaka za AFCON eyakomekkerezeddwa eggulo nga Senegal ettunka ne bannyinimu aba Morocco ku.
Motsepe, yagambye nti wadde Morocco yategese AFCON ekyasinze mu byafaayo, mugumu nti Uganda, Kenya ne Tanzania nazo zirina buli kimu ekyetaagisa okutegeka empaka ennyuvu.
Yategeezezza nti Morooco yatadde ssente nnyingi mu AFCON ezaakoze mu kuyooyoota ebisaawe n’ebirala, n’agamba nti Uganda, Kenya ne Tanzania nazo zikisobola era mugumu nti empaka ezo zigenda kunyumira abalabi olw’enteekateeka ennungi.
“Morocco yategese bulungi era yaweesezza empaka zino ekitiibwa. Ebisaawe, entambula, omutindo gwa ttiimu n’ebirala era etuwadde ekyokulabirako ekirungi,” Motsepe bwe yategeezezza.
Yasabye abantu okwettanira AFCON eddako eya 2027, nti kye yalabako mu CHAN eyategekebwa Uganda, Kenya ne Tanzania mu mukago gwa PAMOJA, muguma nti buli kimu kigenda kuba kirungi.
Yannyonnyodde nti amawanga mangi agaasabye okutegeka AFCON ya 2028, kyokka bakyabitadde ku bbali nga kati basinzekutunuulira AFCON egenda mu East Afrika. “Obukulembeze bwange butunuulidde okukuza amawanga agakyali wansi okusinga agalina obusobozi mu buli kimu,” bwe yagasseeko.
Gye buvuddeko, CAF yalangirira nti empaka za CHAN ezaategekebwa Uganda, Kenya ne Tanzania ze zikyasinze okutegekebwa obulungi bukya zitandikibwawo mu 2009.
Uganda esuubirwa okukozesa Nambole, Hoima City n’ebirala.