Beebugira mwoleso gw'ebyobusuubuzi mu Indonesia

 

Omwoleso guno olw'okubaawo okuva  nga  9th okutuuka  12th October omwaka guno gwakwetabwako  aboolesi abasukka mu 1,500 nga n'abantu abasukka mu 40,000 okuva mu mawanga abasukka mu 100 .

 

Dr. Hohamad Henry Saripudin omubaka wa Indonesia mu ggwanga lya Kenya mu kwanjula enteekateeka y'omwoleso guno okwabadde ku  4 Points  ku Sheraton  Hotel e Kololo yagambye nti Bannayuganda naddala abali mu by'obulimi  n'abongola omutindo ku by'obulimi n'obulunzi baakuganyulwa nnyo mu mwoleso guno.

 

Ye Shukla Paresh, omubaka wa Uganda mu Indonesia yagambye nti wagenda kubeerawo okukubaganya ebirowoozo n'amagezi ag'ekikugu mu by'obusuubuzi gattako n'okutandikawo emirimu wakati w'amawanga gomboriri.

 

"Ng'oggyeko eky'okuganyulwa mu bu by'obusuubuzi , omwoleso guno gugenda kwongera okutumbula obwasseruganda wakati wa Uganda ne Indonesia," Shukla bwe yagambye.

 

Shukla nga y'akulira kkampuni ya Simba Automotive abakola pikipiki ez'enjawulo yagambye nti omwoleso guno gugenda kuyamba kinene nnyo Bannayuganda okunoonyeza ebintu bye bakola eby'enjawulo obutale. 

 

Ye Nkuutu Kirunda diyirekita avunaanyizibwa okukulakulanya bizinensi mu kibiina ekigatta bannamakolero yagambye nti omwoleso guno gugenda kuyamba nnyo Bannayuganda okugaziya obwongo bwabwe mu ngeri gye bakolamu n'okulabamu ebintu eby'enjawulo.