Balemeddwa okukkaanya ku nzirukanya y’eby'omugagga w’e Muyenga

ABAKAAYANIRA eby'obugagga by’omugagga w’e Muyenga  Hellen Nanfuka Wamala eyali nnannyini ssomero lya Muyenga High eyafa mu 2016 balemeddwa okukkaanya ku ngeri y’okubiddukanyamu, balinze kkooti  kubasalirawo.

Obutakkaanya buno bulabikidde mu kkooti  ejulirwamu ey’omulamuzi Remmy Kasule, Miwanda ne banne okuli Paul Kikabi, Edward Kaziraki, Joram Musoke ne Harriet Kamashanyu nga bali wamu n’ebitongole kya Maama Hellen Wamala Fund ne Christian Family Helpers gye baddukira nga baagala kkooti eno esooke eyimirize okuteeka mu nkola ekiragiro ekyayisibwa omulamuzi David Matovu owa kkooti y’amaka e Makindye eyabagoba mu byobugagga bino.

Oluvannyuma  lw’okuteekaayo kusaba kwabwe kuno  omulamuzi Kasule yabalagira basooke babeeko byebakkaanya nga tannaba kuwa nsala ye ku musango guno kyokka  balemeddwa. 

Lucky Henry Kalule omu ku bawawaabirwa  yategeezezza kkooti  nti  bwe baabasindika okukkaanya Miwanda yalemwa  okutuula  wadde nga baamukubira essimu bw’atyo n’agamba nti ekigendererwa kya Miwanda kya kwagala  kubaako kyakwakula okuva mu by’obugagga bino  ng’omusango  guno mwe yajjulira  tegunnaba kusalibwa.

Wabula Miwanda naye agambye nti Nanfuka bwe yafa tewali  kyakyusibwa  era nga bwe byali webiri wabula Kalule baali bakola mu bitongole ne balemwa okukola  obulungi emirimu ne babagoba.

Oluvannyuma lw’abantu bano okulemwa okukkaanya ng’omulamuzi Kasule bw’abade ayagala asazeewo obutabaako kiragiro kyayisa  era n’abalagira okukomawo nga June,14, 2021 awe nsala ye ku kusaba kuno.