Akram ne Dr Kuluthum bakubye aba Poliisi ebibajjo bya Love

DR. Kluthum Nabunnya azze ateetera ne bba Akram Gumisiriza agambibwa okulonda omuwala ekkubo, ne beesogga poliisi y’e Katwe mu ngeri y’okulumya abateesi. Abaagalana bano baatuuse ku poliisi eggulo (Lwakubiri) ku ssaawa nga 5:30
ez’oku makya nga bajjidde mu mmotoka ya langi nzirugavu.
Olwayingidde baagenze butereevu ewa ofiisa akola ku ffayiro ya Akram. Eno baamazeeyo eddakiika nga 10 ne bafuluma, ne balinnya emmotoka eyabaleese ne beggyawo.
Akram yali yateebwa ku kakaluka poliisi ku Lwokutaano lwa wiiki ewedde, oluvannyuma lw’okumala ennaku bbiri mu kaduukulu ka poliisi ku misango gy’okutiisatiisa okutta omuntu. Poliisi yamulagira okweyanjula ku Lwokubiri okulaba ffayiro ye w’etuuse era kye yakoze n’ajja ne mukazi we Kluthum.
Akram okukwatibwa kyaddiridde omuwala ayitibwa Remmy Mwizi okwekubira enduulu kupoliisi y’e Salaama ng’agamba nti Akram yamuggyirayo ejjambiya amuteme oluvannyuma lw’okulemwa okukkaanya. Oluvannyuma omusango gwatwalibwa ku poliisi y’e Katwe etwala ey’e Salaama nga guli ku ffayiro nnamba SD Ref :15/10/10/2023.
Omuwala yategeeza nti Akram yamusisinkana mu kiro ekyakeesa olwa Mmande wiiki ewedde nga yamusanga kumpi n’ebbaala ya Calendar n’amuwa lifuti era ne bakkaanya ng’abantu abakulu okwesanyusaamu, wabula Akram yamuvuga amuzza mu maka
gaabwe ne Kluthum e Salaama.
Mwiza yategeezezza nti olwatuukayo, Akram, n’amwefuulira ng’ayagala okumuggyako essimu ng’alowooza nti amukutte akatambi era bwe yamuggyirayo ejjambiya kwe kukuba enduulu n’akubira ne OC wa poliisi y’e Salaama essimu eyajja okumutaasa.
Mwiza yasaba Akram amusasule ssente obukadde busatu omusango gwe yali amugguddeko aguleke, wabula Akram n’agaana ng’agamba nti omuwala yabadde
mu kkobaane kumubba. Bino byonna byaliwo nga Dr. Kluthum ali mitala w’amayanja,
era bwe yakomyewo mu kiro ekyakeesezza Ssande n’awolereza bba nti abamuggulako emisango baagala kumulyako ssente. Ensonda okuva ku poliisi e Katwe zitegeezezza nti Akram alagiddwa okudda ku poliisi ku Mmande yeeyanjule.