Ssentebe awerennemba na gwa kubba mmotoka ya Gavumenti

Bya Wasswa b. Ssentongo

OMULAMUZI ow'eddaala erisooka ku kkooti e Matugga, Esther Nahirya awadde olwa November 10, 2023 lwagenda okuwa ensala ye kumusango oguvunaanibwa eyaliko ssentebe wa disitulikiti ye Amudati, Francis Kiyonga Adamson ku bigambibwa nti yatunda ebyuma by'emmotoka ya Gavumenti.

Olwaleero Kiyonga yazze ng'asuubira okumuwa ekibonerezo, kyokka omulamuzi Nahirya n'amutegeeza ng' ensala ye bw'etaweddeyo era n'alagira akomewo nga November 10, 2023  lw'agenda okuwa ensala ye ku musango ogumuvunaanibwa.

Kigambibwa nti Kiyonga avunaanibwa omusango ogw’okutunda ebyuma by'emmotoka ya Gavumenti nnamba UG 0654.

Mu  2016 nga gugwaako yakola akabenje mu bitundu by'e Matugga wabula nga  May 24, 2017, kigambibwa nti Kiyonga yakima emmotoka eno nagitwala e Amudati kyokka bwe yagituusa eyo ate n'atandika okutunda ebyuma by'emmotoka kimu ku kimu.

Oluvannyuma nga wayise akaseera akakiiko aka State House anti Corruption kaayingira mu nsonga zino ne batandika okugirondoola  kyokka baagenze okugituukako weyali ekwekeddwa mu bitundu by'e Amudati ng'esigazaako yingini yokka ekyawalirizza akakiiko kano okukwata Kiyonga.

Kyokka Kiyonga olumaze okumutegeeza bino yeemuludde n'adduka ewatali kukkirizza bannamawulire okwogerako naye.