Embundu, tiya gaasi bishangirwe omu maka ga paasita.

N’ebya Faustine Odeke

TORORO

Abatuura b’omu kyaro ekya Oriyoi omu gomborora eya Morukatipe omu disiturikiti eya Tororo batangiire bwanyima y’okushanga ebirwaniso omu maka ga paasita waabo.

Abatuura b'omu kyaro ekya Oriyoi omu disiturikiti eya Tororo abareebiire okutangaara bwanyima ya Paasita waabo kushangwa n'embundu, amasasi, enkyende n'enamba z'emotoka omu maka gye.

Embundu hamwe n’amasasi 31 bishangirwe omunju ya Prophet Gorwell Emanu omu muhiigo ogu Pooriisi ekozire Orwakashatu ebiro 15/11/2023.

Paasita Gorwell Emanu ow'kanisa ya Emanu Ministries International omuri Tororo okwatsirwe ab'eby'okwerinda ahabw'okushanga embundu, amasasi, enkyende n'ebindi omu maka gye.

Ebindi ebishangirwe omu maka ga paasita w’ekanisa ya Emanu Ministries International, harimu obucupa bwa tiya gaasi, ensigo z’enjaayi hamwe n’ebindi ebirikukoresibwa omu bikorwa by’oburogi.

Omuhigo ogu ogubaire gukuriirwe omuduumizi wa Pooriisi ahabwa disiturikiti eya Tororo, Adam Kimuli gwizireho bwanyima ya Emanu kugira ngu enkyende ye ei arikugambwa kuba abaire arindiire omu maka gye ebuzire. 

Enkyende egi etabukire yaatandika kurya abeegi b’eishomero erya Oriyoi Primary School hamwe n’erya Tororo Education Center, ekintu ekyerarikiriize abatuura b’omu kicweka ekyo.

Okutabuka kw’enkyende egi kugyemesereize abarikwebembera amashomero okukinga amashomero kubaasa kurinda abeegi.

Hoona nabwo omu muhigo ogu, Pooriisi eshangire ekiina omunju ya Paasita Emanu eki agizire ngu famire ebaire nekikoresa omu bwire bw’okusiiba.

Pooriisi nabwo ezoire piki piki ensya hamwe n’enamba z’emotoka hamwe n’enshaho ebaire erimu empire z’abashaija ez’omunda ‘underwear, vest, esimu hamwe n’enkaito byona biri omunda y’enshaho ebaire esangiirwe enkonya z’emitumba.

Bimwe aha bintu ebi Pooriisi eshangire omu maka ga Paasita Gorwell Emanu ow'ekanisa ya Emanu Ministries International omuri Tororo.

Pooriisi neegira ngu nyakuteekateekwaho naija kuteebwaho omushango gw’okushanga n’ebikwato bya gavumenti ebirimu ebirwaniso omu bushobya.

Emwe aha motoka ezishangirwe omu kibuga kya Emanu etarikumanywa ebirikugikwataho omu kitongore kya URA ekwatsirwe.

Aliziki Wasagali, omukuru omu kitongore ekya Uganda Wildlife Authority naagira ngu ekitongore nikija kumutaho omushango gw’okutuura n’enyamaishwa z’omu kishaka omu maka gye omu bushobya ekirikuhenda ekiragiro ky’eby’enyamaishwa z’omukishaka ekya Uganda Wildlife Act. 

Eky’okutangaaza, omu kucaaka amaka ga Paasita Emanu, enkyende erugire ahi ebaire eyesherekire nikwo kuruma abaana 2 omu maisho gaba Pooriisi barikureeba.

Omwe aha baana abaribirwe enkyende ei Paasita Gorwell Emanu ow'ekanisa ya Emanu Ministries International omuri Tororo abaire atungire omu maka gye.

Emanu eyehakaine eky’okutuura n’enkyende omu maka gye beitu agizire ngu amaka ge tigarimu buzibu bwona kandi enyamaishwa ez’okutuura omu bantu n’ez’omukishaka nikyo zirikukundira kwijayo ahabw’okuba ngu aineyo emiti y’ebijuma.

#WestUpdates