Museveni ayuuguumizza Kisoro Kayihura n'amusabira akalulu

Pulezidenti Museveni ayuugguumizza ebitundu by’e Kigezi gy’atandise okunoonya akalulu nga yasookedde mu disitulikiti y’e Kisoro ne Rubanda.

Eyaliko omuduumizi wa poliisi mu ggwanga, Gen. Kale Kayihura nga nzaalwa y’e Kisoro yakunze Bannayuganda okulonda Museveni n’abajjukiza wa gy’aggye eggwanga naddala ku nsonga z’emirembe n’obutebenkevu.

Eyaliko Ssaabaduumizi wa Poliisi Gen. Kale Kayihura (ku kkono) naye yabaddeyo.

Kayihura yalaze nga disitulikiti y’e Kisoro bwe yatawaanyizibwanga ennyo abayeekera ba ADF era waliwo olunaku lwe baalumba abantu era eggye ly’eggwanga erya UPDF lye lyayambako okuzza emirembe.

Yagasseeko nti Pulezidenti Museveni ng’ali mu buyinza kye kiseera kyokka eggwanga we libaddeko n’emirembe ebbanga eddene era bw’atyo yasabye kati essira liteekebwe ku kulwanyisa obwavu nga beeyambisa PDM okwekulaakulanya.

Omu ku bawagizi ba Muzeeyi yazze asiize ekifaananyi kye ku lukung'aana olwabadde e Kisoro

PULEZIDENTI BY’ASUUBIZZA
Pulezidenti Museveni mu kwogera eri nnamungi w’abawagizi be abaakung’aanidde mu kibangirizi kya ssaza e Kisoro, yasoose kubeebaza olw’obuwagizi nga mu kulonda okwaggwa baamulonda n’ebitundu 90.5% bwatyo yayongedde n’abasaba okumuwa akalulu kuba bingi by’ateeseteese okubakolera mu kisanja ekijja.

Yalaze emirembe gy’aleese mu ggwanga ekivuddeko okubudamya ababundabunda okuva mu mawanga amalala. Embeera y’obutebenkevu yabasabye bagyeyambise okwekulaakulanya nga bayita mu kwettanira enteekateeka za Gavumenti ez’enjawulo.

Distulikiti y’e Kisoro yaakafuna ssente za PDM ezisoba mu buwumbi 17 ate yo munisipaali  eno ng’erina emiruka 7 yaakaweebwa ssente za PDM ezisoba mu buwumbi 2 ng’awamu zaakaganyulwa amaka 20,458.

Abamu ku bantu abaayiise ku kisaawe e Kisoro

Yalaze ebyobusuubuzi bwe byongedde okututumuka nga kati amakolero gakola ebintu eby’enjawulo nga ssukaali, seminti, omwenge, ssabbuuni, emitayimbwa n’ebirala.

Basobodde okubunyisa amazzi mu kitundu kyabwe nga gali ku bitundu 85% ate zo enguudo nazo zikoleddwa okuli olwa Kabale–Kisoro–Bunagana sso ng’ate era n’oluguudo lwa Kabale–Lake Bunyonyi - Kisoro–Mgahinga nalwo lugenda kukolebwa ssaako n’enguudo endala naddala ezigenda mu bifo by’obulambuzi.

Amasomero ga Gavumenti geeyongedde obungi e Kisoro ng’aga pulayimale gali 136 ate go aga siniya gali 14 nga kyenkana buli muluka n’eggombolola birimu essomero. Yabasuubizza nti mu kisanja ekijja waakufuba okulaba ng’ayisa etteeka erikugira amasomero ga Gavumenti okusasuza abayizi fiizi.

E Kisoro, Pulezidenti yatongozza SACCO ya Bufumbira Twifatanye Saving and Credit Cooperatives Union Limited ng’esingamu balimi .