Ekitongole ky'amakomera kifulumizza ebigenda okugobererwa mu nnaku enkulu

EKITONGOLE ky'amakomera, kifulumizza ebiragiro, ebigenda okugobererwa nga tuyita mu nnaku enkulu.

Emirimu gy'ekkatala eri abasibe , giyimiriziddwa mbagirawo mu kiseera kino okutuusa nga tumazeeko ennaku enkulu.

Okukyalira abasibe kugenda kuyimirizibwa okutandika nga Dec 24  okutuukira ddala nga Dec 27 , ate era bongere okubayimiriza okuva nga January 1 okutuuka nga January 4, 2026 wamu ne January 14 okutuuka January 16 eri abo abalina abantu baabwe mu makomera.

Abaserikale bonna, babalagidde okubeera obulindaala mu bifo gye bakolera, n'okulawuna ennyo amakomera mwe bakuumira abasibe .

Mu kiwandiiko ekifulumiziddwa omwogezi w'amakomera, Frank Baine, agambye nti akulira amakomera mu ggwanga ,Dr. Johnson Byashaija era agaanyi  abantu okumala gakyala mu bbaalakasi z'abaserikale.

Agasseeko nti kino, kikoleddwa okwongera okukuuma obulungi abasibe  n'okwewala abakyamu n'obuzzi bw'emisango obuyinza okubalukawo mu biseera bino eby'ennaku enkulu.