Agambibwa okugezaako okukuba abaserikale nga bamukwata akubiddwa amasasi n'atwalibwa e Mulago ku mpingu

OMUVUBUKA agambibwa okuba omubbi, akubiddwa amasasi agamulumizza n'atwalibwa mu ddwaaliro e Mulago okujjanjabibwa  gye bamukuumira ku mpingu.

Joseph Wataba agambibwa okuba mu kibinja ky'abeebijambiya abaludde nga batigomya abatuuze b' e Nsimbiziwoome, Kigoowa, e Bukoto mu munisipaali y'e Nakawa, y'akwatiddwa poliisi.

Bamukwatidde ku luguudo lwa Northern by pass gy'agambibwa okugezaako okwagala okutema abaserikale ne bamukuba amasasi mu kumukwata.

Kidiridde ababbi abeebijambiya nga bali ku pikipiki, okulumba omusomesa Patrick Kasasa mu Nsimbiziwoome ne bamunyagako amasimu, ssente, laptop n'ebintu ebirala ebiri mu bukadde 4.

Beeyongeddeyo mu Kigoowa ku luguudo lwa Valley Rd, ne banyaga Shadia Namaganda amasimu, n'ebiwandiiko nga bibalirirwa mu bukadde nga 4 ne banyaga ne Bosco Nsobya ebintu ebiwerako.

Amyuka omwogezi wa poliisi mu Kampala , Luke Owoyesigyire, agambye nti poliisi ezudde pikipiki nnamba UMA 582 HF , ebiso, n'ezimu ku ssimu ezabbiddwa.