ENGERI OMUSIRAAMU GYE WANDYEYISIZZAAMU KU SSEKUKKULU

Nabbi Muhammad (S.A.W) yagamba nti, weerekereze eby'ensi Allah ajja kuk­wagala era weerekereze abantu bye balina, nabo bajja kukwagala. Emu ku mpagi omukaaga ez'obukkiriza mu Busiraamu kwe kukkiriza ba Nabbi ba Allah nga ne Yesu gwe tuyita Nabbi Isha mwomutwalidde.

Sheikh Abdunul Kasolo agamba nti, mu Hadith ya Nabbi Muhamed (S.A.W) mu Sulat Imran aya 85 egamba nti, olina okuwa ba Nabbi ba Allah bonna ekitiibwa era aso­sola mu Bannabbi ba Allah obeera mujeemu.

Yesu oba Nabbi Isha Obusir­aamu bumutwala nga Nabbi wa Allah kw'abo 25 okuva ku Nabbi Adam okutuuka Nabbi Muham­mad (S.A.W) eyasembayo nga addirirwa Yesu.

Ayongerako nti mu Busir­aamu, Isha Nabbi, Katonda gwe yatuma okusaasaanya obubaka bwe ng'ayita mu njiri ng'ababaka abalala bwe baayita mu bitabo eby'enjawulo okutuusa obubaka bwe, nga Nabbi Muhammad (S.A.W) yayita mu Kulaani, Musa mu Tawlet olwo Dauda ye Allah n'amuwa okutuusa obubaka eri abantu be ng'ayita mu kitabo kya Zabbuli.

Agamba nti, okumanya Obusir­aamu bwe businga okwagala Nab­bi Isha eragira n'okumukoppako ebirungi bye yakola nga mu Kulaani sulati Mariam aya I9 - 35 ne Imran.

Sheikh Kasolo agamba nti, toy­inza kubeera mukkiriza okugyako ng'otadde mu Allah n'ababaka be ekitiibwa naddala abo be yawa ebitabo okuyisaamu obubaka bwe. Allah asunguwalira abantu abagamba nti Yesu mwana we kubanga Allah tazaala.

Sheikh Hassan Wasswa agamba nti, Yesu oba Nabbi Isha tazaali­bwa Katonda. Agamba nti, abantu bazaala kwaaza musaayi gwabwe ekitali ku Katonda kubanga ye ali omu yekka teyeetaaga kwongerwa­ko mulala. Kale bwatyo n'akubiriza Abasiraamu obutenyigira mu mu bikujjuko ebyo.

ENGERI OMUSIRAAMU GY'OLINA OKWEYISAAMU KU SSEKUKKULU

1. Weewale okujeemera Allah.

Sheikh Abdunulu Kasolo agamba nti, mu Sulat Bakhala aya 98, egamba nti, ne bw'oyagala otya Al­lah kyokka n'owalana ababaka be obeera ofuuse Mukaafiiri era omu­jeemu. Kale kikukakatako okubuu­lirira baganda baffe Abakrisitaayo okutwala Yesu ng'omubaka wa Allah.

2. Obusiraamu ffe tusinga okwagala Nabbi Isha kubanga ne mu Kulaani mu surati Mariam eraga engeri Isha gye yazaalibwa, enneeyisa ye eteeriimu kusosola, ng'Omusiraamu tososola muli­raanwa wo n'abantu ba Allah bonna kubanga Yesu talina gwe yasosola okuggyako okugatta. Allah ajja kwongera okukussaako ekisa kye oyoole empeera.

3. Nabbi Isha yayunganga oluganda era obusomesa bwe bwali tebuliimu kyekubiira. Kale ku lunaku nga luno, osobola okulukoz­esa okukyalako mu baganda bo mu Busiraamu, abalwadde n'okwongera okunyweza oluganda.

4. Nyikirira okusaddaaka n'okugabirira abatalina busobozi. Ku lunaku luno nyiikirira okusad­daaka, okusaala n'okutoola zzaka nga bwe weenenya n'okusoma Kulaani oyoola empeera.

5. Nabbi Isha yayagala nnyo nnyina kuba wadde Allah yamukozesa ebya­magero okuva nga muto, bwe yawonya endwadde, okuzuukusa abafu n'ebyamagero ebirala teyeegulumiza. Omusiraamu kozesa olunaku luno oyongere okunyweza enkolagana yo ne bazadde bo. Bw'obeera wabasobya weenenye bakusonyiwe. Kubanga ku nsi omu­zadde kye kisumuluzo ekisooka kubanga Allah awulira mangu essaala y'omuzadde.

6. Mwettanire okugenda mu ddalasa oba emisomo gy'eddiini y'Obusiraamu kikuyambe ok­wongera okumanya kwo eri eddiini yo.

7. Kiba kirungi okuteekawo enkolagana ennungi wakati w'abajaguza n'abatajaguza. Tolina kuvoola muntu yenna wabula fuba kumusomesa ajja kumanya ekituufu ng'ekiseera kituuse.

8. Tumulina kuyamba bakuza lunaku olwo okweyisa mu ngeri Allah gyatayagala wabula olina kukola Obusiraamu kye bugamba n'omalako olunaku ng'okola emirimu emirungi egisanyusa Allah ng'okusonyiwa eyakusobya, okugaba n'ebirala.